شويه نصايح تفرفشك

إشتري علبة شوكولاتة مستوردة غالية و كلها.

إلعب لعبة مالعبتهاش من و إنت صغير.

إعرق و إنهج و حس إنك عايش.

بص لأهلك و عرفهم قد إيه بتحبهم.

بص للي تحتك و إعرف قيمة كل حاجة معاك.

بص للي فوقيك و إعرف إن رغبتك إنك تبقى زيهم هي اللي
مدية طعم لحياتك.

إستمتع بشمس الصيف.. بصلها و قولها إنك مش كارهها.. حتى
لو عرقتك ...

إشتغل لحد ما تحس إنك مت.. نام ثاني و إشحن و روح موت
نفسك ثاني.. وإعرف إنك زودت حاجة للدنيا ماحدش كان هيزودها غيرك.

إعرف إنك كائن مهم و في كل لحظة بتغير إتجاه التاريخ.

بص لشحات واقف جمبك.. ماتديلوش ولا نكلة.. بس سلم عليه و
إضحكله و قوله “عامل إيه؟ تمام؟”

سلم على واحد صاحبك و خدوا بالحضن.. و زود مدة الحضن
ثانية زيادة.. هتقوله حاجات كثير..

بدون سبب إبعت رسالة لأي حد بتحبه قوله حاجة حلوة.

إفتح شباك العربية و إطلع على طريق سريع خلي الهوا “يطس”
في وشك.. صرخ.. بس إتأكد إنك مش داخل على لجنة و إنك لوحدك و مافيش حد تعرفه في
العربيات اللي حوليك.

إضربها جزمة.

خلى اللي يكره يكره و اللي يشتم يشتم وإعرف إنهم مضيعين
وقتهم.

إتأكد إنك لو عارف إنك هتموت بكرة هتعمل نفس اللي بتعمله
دلوقتي.

حب جامد قوي حتى لو حبك مش هيستمر لحد بليل.

كل أكلة حلوة قوي.. بس ماتخليهاش تشبعك.

إشرب مشروب دخلت المطبخ و إخترعته و لو ماعجبكش إرميه في
الحوض و إنزل إشرب حاجة ثانية بتحبها.

ماتشربش شيشة أو سجاير.. إشرب الهوا.. إستمتع بيه.. مش
هتعرف قيمته إلا لو خلوا الهوا بفلوس.. ساعتها هتستمع بيه .

أكسب نفسك و حب حد بيكرهك.

إكسب نفسك ثاني و حب حد بتكرهه.

إكسب نفسك ثاني و إنسى حد لسه بتحبه من غير ما تكرهه.

إتفرج على ماتش كورة لفرقتين ماتعرفهمش و شجع واحد فيهم
قوي.. قوي.. حتى لو كان بيلعب زي الزمالك هههههههههههههه ..

إنزل شجع مع الزملكاوية لما يكسبوا.. حتى لو إنت مش
زملكاوي.

إقرا الكلام ده من غير ماتعلق عليه و لو مش عاجبك بطل
قراية.

شوف فيلم الكيف و ماتتفرجش على آخر ربع ساعة فيه.

إتفرج على الناظر من أول ما بيظهر محمد سعد.

لما تقابل واحد مش فاكر إسمه و مش بتسلم عليه عادة خده
بالحضن و قوله واحشني جدا يا معلم..

إقرا كتاب عن موضوع معقد مانتاش فاهمة و بعدها إنزل مع
صحابك.. هتتبسط قوي.

جرب أكلة جديدة في مطعم فخم.. ثمنها يخرب بيتك.. و روح و
إنت مبسوط.

إلبس أحلى لبس عندك و إنزل إمشي في الشارع و إنت فارد
ظهرك.. و ماتحطش إيديك في جيبك خليهم أحرار.

إفتكر قبل ما تنام كل الكلام الحلو اللي سمعت الناس
بتقوله عنك.

كل ما تلاقي حد بيحكي عن مشكلة دورله عن الجانب المشرق
فيها.. مهما كانت عويصة.. طلعله فيها فوايد و باركله.

كل ما حد يقولك إزيك عامل إيه؟ قوله الحمد لله مبسوط
قوي.. قولها بسرعة من غير ماتفكر و إبتسم.. لوحدك هتتبسط فعلا.

شوف إيه أكبر مشكلة في حياتك.. فكر في أسوأ حاجة ممكن
تحصل بسببها و هتلاقيها مش هتموتك و هتفضل برضه في الآخر فوق الأرض مش تحتها و إن
الدنيا هتمشي و إحمد ربنا.

فكر في الموت كويس.. و إعرف إنه لسة ماجاش و إعرف إنه
قبل ما ييجي لازم تعمل كل اللي نفسك فيه.. و لازم تتبسط و ماتضيعش لحظة مدايق مهما
كان السبب.

سافر حتة ماروحتهاش قبل كده.. صورها و صور نفسك فيها..
صلي فيها.. أو بوس أرضها.. أو خد منها تذكار و إرجع ثاني نام على سريرك و عرفه إنه
وحشك.

جيب لنفسك هدية و إستنى لحد عيد ميلادك و إديها لنفسك.

جيب هدية لحد بتحبه من غير مناسبة.. و إديهاله في عدم
إهتمام كأنك ماعملتش حاجة غريبة.

إشرب مية كثير.

ماتغضبش مهما حصل.

أشكر كل الناس بسبب و من غير سبب.

لو حد إتريق عليك إضحك.. حتى لو من جواك بتضحك عليه.

لو حد شتمك حط ده في تانك البنزين بتاعك علشان يبقى طاقة
تحركك لقدام.

لو الناس بعدت عنك إعرف لأنكم مش زي بعض.. لا هما وحشين
و لا إنت وحش.. إنتم بس مش زي بعض.. و إتبسط إنك مش بتضيع وقتك معاهم.

لو لقيت نفسك لوحدك شوية ده معناه إنك فريد و نادر من
نوعك.. و مين في الدنيا يقول إن نوعك غلط أو وحش.. بس إنت تقدر تتأكد إن ده النوع
المناسب ليك.. و إتبسط بيه.. و لو نفسك تغيره غيره.. مافيش حاجة بتلزق حتى إسمك و
دينك.

بص لإمبارح.. و شوف إتعلمت منه قد إيه..

خطط لبكره بس إوعى تخاف منه .. إزاي تخاف من حاجة إنت
اللي بتبنيها أصلا.. حاجة لسة ماحصلتش و ماحدش في الدنيا يقدر يعرف إيه اللي هيحصل
فيها..

إستمتع بالنهاردة كويس.. لأن كل نهاردة هيبقى إمبارح
بتاع بكرة زي ما كان بكرة بتاع إمبارح..

لما حد يحكيلك حاجة مملة علشان يبين مواهبه في الحياة
إعمل نفسك متهم آخر حاجة و لما يخلص إعمل نفسك منبهر آخر حاجة برضه.. و كمان إسأله
عن تكملة الحكاية.. بس ماتعملش كده كثير.. مرة كل فين و فين..

إفتكر أيام لما كنت بتصحى بدري علشان المدرسة.. و لما
كنت بتذاكر فيزيا أو تاريخ.. و أهلك مانعينك من النزول و إتبسط إن ده كله خلص و مش
راجع ثاني.

إتبسط.. و لو مش عايز تتبسط.. مش هتعرف تعكنن عليا.

تسلمى بنوته
موضيعك كلها بجد جميله جدا
مش ببقى عارفه ققولك اه؟
تسلم ايدك

اقتباس :: بدون سبب إبعت رسالة لأي حد بتحبه قوله حاجة حلوة.

بدون سبب ببعتلك رساله يا بنوتي وبقولك
اذا اردتي يوم ان تعرفي مدي حبي لكي فمتحاوليش عشان

براحه انت مستعجله علي ايه

الله خلاص حقول اهه

يا بنتي العجله من الشيطان

طيب خلاص حقول

1

2

3

اعتقد انك نسيتي اصلا كنا بنتكلم عن ايه

عشان دي حاجه ميعرفهاش غيري انا وربنا سبحانه وتعالي

هههههههههههههههههههههههههههههه

شكرا لمرورك يا كرمله

وشكرا لمرورك يا فراشتى واكيد انتى كمان واثقه انا بحبك قد ايه برده حاجه ميعلمهاش غير ربنا سبحانه وتعالى ودى احلى رساله وصلتنى فى حياتى كلها

» نصايح للثقه فى النفس
» تعالوا نضحك شويه
» ناوي تخطب واحده .. طب ركز معايا شويه !!